Home / Archivio / Farcadice, diari di viaç

Farcadice, diari di viaç

Farcadice, diari di viaç
Un pugn tal stomi. Cheste e je la sensazion che si à cjalant la ultime fadie di Luca Peresson e Carlo Della Vedova che, cun imagjins e i ricuarts di chei che le àn vivude, a conti la disperazion e la vite dai nestris migrants in Belgjiche, in particolâr tes minis di Charleroi. “Farcadice: diari di viaç”, presentât joibe ai 8 di Jugn a Tarcint, al è un percors che no si limite dome a cheste esperience, ma al partìs di un progjet che al nas te metât dai agns Novante. O jerin tai prins agns di Internet e la Grande Rêt e je semeade subit un imprest fondamentâl par gjavâ i confins e scurtâ lis distancis, ancje e soredut cul Friûl di chenti e il Friûl che al è ator pal mont. E cussì Luca Peresson, un dai doi regjiscj, al à tacât a pensâ a di une sorte di agorà virtuâl li che i furlans, sparniçâts pai continents par cause de diaspore de emigrazion, a podessin tornâ a cjatâsi e svicinâsi. Cuant che tal 1996 al è nassût il sît internet di Radio Onde Furlane (www.friul.it), il prin dut par furlan, di dut il mont a son tacâts a rivâ messaçs di furlans migrants, che midiant di cheste novitât a àn vude la ocasion di vê un leam in plui cu la lôr tiere mari. E tor de fin dal 1997 Claudio Roja al cjape contat cun Luca Peresson: di Colonia Caroya (fondade tal 1878 te provincie di Cordoba, nord de Argjentine) al Friûl e je nassude prime une cognossince che je deventade cul timp une vere amicizie, ma che e veve il difiet di jessi inmò dome virtuâl. Stant che lis afinitâts a jerin tantis (ancje Claudio Roja al lavorave intune Radio furlane, ma in Argjentine) te Vierte dal 1998 a Luca Peresson e Carlo Della Vedova ur è vignude voie di lâ plui insom te cuestion e e je nassude la idee di cjapâsi sù e provâ a fâ un documentari propit a Colonia Caroya, une des citâts furlanis plui grandis dal mont, stant che li a vivin plui o mancul passe 25.000 nevôts e fîs di nevôts di migrants furlans che a fevelin marilenghe intun miscliç straordenari di Friûl e Sudameriche. Dopo cheste esperience entusiasmante che e à puartât il documentari (une autoproduzion di Cooperative di Informazion Furlane e Entract film) ator par cetantis rassegnis cinematografichis, no dome dal Friûl, ma ancje inte Americhe Latine, midiant di un altri amì, Jean Linussio, i doi regjiscj a àn pensât che la idee di “Farcadice: diari di viaç” e varès podût continuâ, stant ancje il sucès che al veve vût chest prin documentari furlan argjentin. Al è stât cuasi naturâl pensâ ae Belgjiche ancje parcè che il materiâl a disposizion par fâ chest studi al jere za tant, ancje midiant di une persone che e deventarà no il protagonist dal documentari, ma une vere clâf di leture, une dimension di cognossince une vore preseose dal fenomen migratori furlan tes minis belgjichis: ven a stâi Alberto Micossi, miôr cognossût come Bertino. Dopo agns in mine a Charleroi a fâ i poçs des minis, val a dî il prin stadi di sgjâf, cu la funzion di jentrâ par prin tal teren e inviâ cussì la nassite de mine stesse, Bertino al jere tornât in Friûl. Fin dai prins agns Otante, i doi regjiscj a vevin cognossût chest ostîr che al veve un frascje a Sedilis di Tarcint e che tai moments di calme si fermave cun lôr a contâ de sô vite di migrant minadôr. In “Farcadice: diari di viaç - Chaleroi (Belgjiche)” e ven fûr une realtât dramatiche, ma cence retoriche e cuntune delicatece no facil di cjatâ. Cheste opare, finide tal Fevrâr dal 2006 e realizade cul sostegn finanziari de Regjon Friûl Vignesie Julie e il Comun di Tarcint, e je cetant distante di ce che al jere nassût cu la esperience a Colonia Caroya. Al è une vore dificil rivâ a restâ frêts e impassibii denant des peraulis di nestris coregjonâi che tal Secont Dopovuere a son stâts “vendûts par un sac di cjarbon”. La migrazion tes minis de Belgjiche e je la conferme che la nestre Italie e je jessude ben maçade de Seconde Vuere Mondiâl e che la situazion dal nestri Friûl di chei agns e jere chê di une regjon intun Stât sconfit, li che mangjâ al jere pardabon un probleme di ogni dì. E par frontâ cheste miserie nere, i nestris zovins a àn scugnût acetâ di partî par lâ intun puest che no cognossevin, cence nancje savê ce che di precîs ur varès spietât. L’acuardi cu la Belgjiche (refudât sedi de Spagne, sedi de Polonie) al è stât acetât dal Stât Talian cence informâ i lavoradôrs des condizions dramatichis che a varessin cjatât là sù. E po il fat che restâ sierâts vot oris a 1.200 metris di profonditât a respirâ polvar di cjarbon, cu la cuasi sigurece di inmalâsi di silicosi e il pericul costant che ti coli dut intor al fos, dut câs, miôr che no restâ a murî di fam a cjase, nus dâ la fotografie plui clare di ce che al jere il Friûl te metât dai agns Cincuante. E la fuarce di chest video a son i ricuarts de int che midiant di une testemoneance inmò vive e rive cualchi volte ancje a sdramatizâ suntune situazion che e je stade pardabon ai confins de realtât e de umanitât. Ce che al fâs pensâ al è un paragon che al ven subit tal cjâf cuant che si tache a fevelâ de Coriere Olivo che, ancje se intune situazion di precarietât, e à permetût aes fameis dai migrants di restâ simpri dongje. Tai chei viaçs des sperance (o de disperazion) nol è dificil viodi un spieli cu la migrazion di vuê che invezit e rive in Italie: podê resonâ di plui su chest aspiet de nestre storie, salacor nus puartarès a frontâ in maniere divierse il probleme de integrazion, se no altri par no cjatâsi a tornâ a fâ vivi su altris ce che i nestris migrants a àn patît su la lôr piel. Une sglavinade di emozions ti si sdrumin intor cjalant chest document preziôs che si siere cuntune dramatiche domande su la situazion dai migrants furlans che a son inmò in dì di vuê in Belgjiche. Une domande che inte Europe dal Doimil no rive a vê une rispueste acetabile. Ma il percors al continue e za si fevele di Sud Afriche?
0 Commenti

Cultura

Economia

Sport news

Politica

Il Friuli

Green

Business

CINEMA

Invia questa pagina ad un tuo amico
I campti contrassegnati con * sono obbligatori