A son passâts passe 30 agns di cuant che i prins autonomiscj, ispirâts de intuizion di pre Checo Placerean, a vevin scomençât a cjatâsi a Aquilee, tornant a ricuardâ la date dai 3 di Avrîl, cuant che tal 1077, al nasseve il Stât Patriarcjâl, vuidât di Siart, sot dal imperi di Indrì IV.
E in dì di vuê la Fieste dal Friûl e je poiade di istituzions publichis e privadis, che ogni an si cjatin pe celebrazion uficiâl intun comun difarent di une des tres provinciis furlanis.
Chest an i tocje a la provincie di Gurize e in particolâr al Comun di Dolegne che al ospitarà la fieste uficiâl domenie ai 7 di Avrîl. Ma il comitât organizadôr, vuidât de aministrazion provinciâl di Udin adun cul comun di Dolegne, chel di Sant Zorç, la Arlef, l’istitût ladin furlan Pre Checo Placerean, l’Ufici scolastic regjonâl, la pro loco di Dolegne, l’istitût Achille Tellini, la Patrie dal Friûl e la Societât Filologjiche Furlane, al à metût adun un calendâri siôr di events che si davuelzaran in tancj comuns dal Friûl.
Domenie ai 7 di Avrîl il moment principâl di dut il calendari: aes 11 a Dolegne e sarà la messe par furlan, la leture de bole imperiâl di Indrì IV, a misdì i salûts istituzionâi e la premiazion dal concors pes scuelis.
Ancje i uficis scolastics provinciâi a stan mandant a ducj i students des scuelis secondariis di prin grât des provinciis di Gurize, Pordenon e Udin i opuscui informatîfs sul significât storic e attuale, invidant i dirigjents scolastics a sensibilizâ insegnants e students.
Il Stât Patriarcjâl di Aquilee, o Patrie dal Friûl, al durà dal 1077 al 1420, deventant une des plui impuartantis potencis de Europe centrâl di in chê volte. Il podê dal Patriarcje e al jere belançât di une des plui modernis istituzions tant che il Parlament dal Friûl, che al meteve adun i rapresentant de nobiltât, dal clericât e des comunitâts che si riunivin tal salon dal Cjistiel di Udin. Come che al veve scrit pre Checo Placerean “Nô o vin i documents, par dî, di une riunion dal Parlament furlan di vincj agns prime dal Parlament inglês. Chel al veve une sole funzion: che il re nol podeve imponi une tasse, e tirâle, cence che i siôrs si metessin dacuardi su cui che al veve di paiâle”.
Ricuardâ vuê il 3 di Avrîl duncje nol rapresente une riecovazion fin a se stesse, ma un moment par resonâ in clâf moderne su lis formis di autoguvier e rapresentativitât che a àn caraterizât la Patrie dal Friûl, valorizant la identitât furlane come rispueste ai pericui de globalizazion.
3 aprile 2013
